Riba Diabierna 12 y Diasabra 13 di Maart 2021 CEDE Aruba en cooperacion cu Oranje Fonds ta organisa ARUBA DOET, e accion boluntario mas grandi na Aruba.
ARUBA DOET a cuminsa na aña 2013 bou iniciativa di Oranje Fonds. Bou nombernan di NL DOET, ARUBA DOET, BON DOET, CURA DOET, STATIA DOET y SMX DOET, e seis iniciativanan aki ta pone trabou boluntario den spotlight y stimula tur hende pa pone man na obra pa un of parti di dia. Asina Oranje Fonds hunto cu miles di organisacionnan social y partnernan manera CEDE Aruba ta organisa e accion boluntario mas grandi den Reino.
Boluntarionan
Boluntarionan ta e motor tras di hopi organisacionnan social. Cu ARUBA DOET, CEDE Aruba y Oranje Fonds ta demonstra con importante ciudadanonan activo ta pa comunidad. Banda di esey ARUBA DOET ta aporta na e bon imagen di trabou boluntario y ta ilustra con dushi esaki por ta.
Cantidad record
Na 2019 nos a haya 3300 boluntario y 185 proyecto, na 2020 mas di 2000 boluntario a duna un man na 191 proyecto na Aruba. Naturalmente na 2021 nos kier pa mas hende ta activo durante e dianan di ARUBA DOET, asina ta regista bo proyecto of participa como boluntario!
Oranje Fonds & CEDE Aruba
Oranje Fonds ta e fondo mas grandi riba tereno social y ta demostra e miho parti di Reino. Pa aña Oranje Fonds ta inverti mas o menos €30 miyon den organisacion y iniciativanan cu ta reforsa e lasonan social na Hulanda y e parti Caribense di Reino. Rey Willem-Alexander y Reina Maxima ta e pareha protector di e Fondo aki. Bishita www.oranjefonds.nl pa mas informacion.
CEDE Aruba ta un organisacion cu ta duna sosten na desaroyo y co-financiamento di programa y proyectonan den sector social. E programa y proyectonan aki ta wordo introduci y realisa pa non-governmental organizations (ngo’s). Na Aruba tin hopi NGO’s cu ta haci nan esfuerso pa mehora e facilidadnan social pa comunidad. CEDE Aruba ta yuda NGO’s cu desaroyo y financiamento di tur sorto di proyecto duradero. Bishita www.cedearuba.org pa mas informacion.
